Inicio » 2012 » Junio » 1 » Ն. Ս. Օ. Տ. Տ. ԳԱՐԵԳԻՆ Բ ԱՄԵՆԱՅՆ ՀԱՅՈՑ ԿԱԹՈՂԻԿՈՍԻ ԽՈՍՔԸ ՀԱՂԹԱՆԱԿԻ ՏՈՆԻ, ԼՂՀ ՊԱՇՏՊԱՆՈՒԹՅԱՆ ԲԱՆԱԿԻ ԵՎ ՇՈՒՇԻԻ ԱԶԱՏԱԳՐՈՒԹՅԱՆ 20-ԱՄՅԱԿԻ ԱՌԻԹՈՎ
4:02 PM
Ն. Ս. Օ. Տ. Տ. ԳԱՐԵԳԻՆ Բ ԱՄԵՆԱՅՆ ՀԱՅՈՑ ԿԱԹՈՂԻԿՈՍԻ ԽՈՍՔԸ ՀԱՂԹԱՆԱԿԻ ՏՈՆԻ, ԼՂՀ ՊԱՇՏՊԱՆՈՒԹՅԱՆ ԲԱՆԱԿԻ ԵՎ ՇՈՒՇԻԻ ԱԶԱՏԱԳՐՈՒԹՅԱՆ 20-ԱՄՅԱԿԻ ԱՌԻԹՈՎ
Մեծարգո Նախագահ Հայաստանի Հանրապետության տիար Սերժ Սարգսյան, Մեծարգո Նախագահ Արցախի Հանրապետության տիար Բակո Սահակյան, Վաստակյալ նախագահներ տիար Ռոբերտ Քոչարյան և տիար Արկադի Ղուկասյան, Գերաշնորհ, հոգեշնորհ, արժանապատիվ հոգևոր հայրեր, Հարգարժան պետական այրեր, Սիրելի հավատավոր ժողովուրդ և պատվական հյուրեր.
Մայր Աթոռ Սուրբ Էջմիածնից անհուն ուրախությամբ եկել ենք Հայրապետական Մեր օրհնությունը բերելու և խնդակից լինելու ձեզ Մայիսի 9-ի այս լուսավոր, բերկրանքով ու քաջալերությամբ լեցուն օրը, երբ տոնում ենք Երկրորդ համաշխարային պատերազմի հաղթանակը, Շուշիի ազատագրության և Լեռնային Ղարաբաղի Հանրապետության Պաշտպանության բանակի 20-ամյա հոբելյանները: Եկել ենք շնորհավորելու և Մեր գնահատանքը բերելու ձեզ, մեծարգո Նախագահ Հայաստանի Հանրապետության, մեծարգո Նախագահ Լեռնային Ղարաբաղի Հանրապետության, հայոց պետական այրեր, սիրելի հաղթանակած ժողովուրդ` Մեր հավատավոր զավակներ Արցախի, Հայաստանի և Սփյուռքի: Մեր շուրթերին այս պահին սաղմոսերգուի օրհներգն է, որ որպես աղոթք` բարձրացնում ենք առ Տերը` ասելով. ՙՔո երեսի լոյսը ծագեց մեզ վրայ, եւ ուրախութիւն տուեցիր մեր սրտերին՚ (Սղմ. Դ 7-8): Շուշիի ազատագրումով Աստծո արդարության լույսը փայլեց մեր կյանքում` լիառատ ուրախությամբ համակելով սրտերը մեր ժողովրդի և առատացնելով հույսերը պատերազմի հաղթական ավարտի: Այսօր լռել են պատերազմի ձայները: Շուշիի Սուրբ Ամենափրկիչ նորոգված ու նորաշուք եկեղեցու զանգակատան բարձունքից հրեշտակները հնչեցնում են օրհներգության փողը հաղթանակի ու խաղաղության, հնչեցնում են շեփորն ազատ կյանքի և արդար իրավունքի, որը երբեք և ոչ մի ժամանակ չլռեց մեր ժողովրդի հոգում: Ազատ ապրելու այս ոգով է գրվել մեր դարավոր հերոսական պատմությունը: Այս ոգով մեր ժողովուրդը, այդ թվում` Արցախի քաջարի զավակները, իր արժանի մասնակցությունն ու մեծ ավանդն է բերել Երկրորդ աշխարհամարտում` պայքարելով ազգերի լիիրավ ու խաղաղ կյանքի համար: Այսօր ազգս հայոց` նույն ոգով հաղթանակած Արցախյան ազատամարտում` տերն է իր արդար իրավունքների: Դժվարին, բայց հույսով, հավատքով ու տեսիլքով լեցուն ուղի ենք անցել, սիրելիներ: Մենք հաղթեցինք պատերազմում, որը մենք չէինք սկսել: Այդ պանծալի հաղթանակը մեր ժողովուրդը կերտեց հերոսական մաքառումով, անհամար զոհողություններով, հավատավոր և հայրենանվեր հոգու արիությամբ: Արցախով զորացան սրտերը աշխարհասփյուռ մեր ժողովրդի, և համախմբվեց ազգս` մեկտեղելով իր ուժերն ու հնարավորությունները հանուն Արցախի պաշտպանության և հայրենի պետականության ազատ ու բարօր կյանքի: Արդարև, Արցախի այս հողն ու երկիրը, որ մի բուռ տարածքն է պատմական մեր Հայրենիքի, վերջին երկու տասնամյակի իր պատմությամբ վկայությունն է բերում մեր ժողովրդի հայրենասեր ու ազգանվեր հոգու, վճռական կամքի. հաղթական բազկի, միասնականության և համատեղ ջանքերի արդյունավորման: Փառք և գոհություն Աստծո, այսօր Հայաստանի և Սփյուռքի կողքին օր օրի շենանում է Արցախը, լցվում բարեբեր ու խնդառատ կյանքով: Համայն մեր ժողովրդի աջակցությամբ, արդար վաստակով, արցախահայության ջանք ու նվիրումով բարձրանում են դարավոր վանքերն ու եկեղեցիները, նորոգվում ու պայծառանում հոգևոր, գիտակրթական ու մշակութային կյանքը: Կառուցապատվում և նոր կյանքով է լցվում նաև Շուշին` պատմական ծաղկուն քաղաքն Արցախի: Ազատ Արցախում ծնված սերունդն այսօր կյանք է մտնում պայծառ գալիքի նոր տեսլականով: Այս ձեռքբերումներն ու արդար հույսերը առավել պարտավորեցնում են մեզ հայրենակերտումի նոր սխրանքների: Սիրելի ժողովուրդ հայոց, Աստծո լույսն ու օրհնությունն են ծագել մեզ վրա, ունենք գլխավորը` մեր Հայրենիքի ազատությունը: Մեր հույսն առ Աստված, հավատքով զինված, քրիստոնեական արժեքներին, մեր Սուրբ Եկեղեցուն հավատարիմ` կառուցենք վաղվա լուսավոր օրը: Դեռևս քիչ չեն դժվարություններն ու խնդիրները: Մեր կյանքի հրամայականներին պիտի դիմագրավենք և բոլոր խոչընդոտները պիտի հաղթահարենք Հայրենիքի հանդեպ նույն սիրով ու պատասխանատվությամբ, լավագույն ծառայությամբ ու հայրենանվեր ազնիվ գործերով, որոնցով և ձեռք են բերվել մեր հաղթանակները: Թող մեզ զորացնեն ազատության և հայրենի պետականության վերահաստատման մեր անցած ուղին, նաև` հզոր և միասնական Հայրենիքի մեր իղձերն ու տեսիլքները, մեր զավակների, մեր ժողովրդի լուսավոր գալիքի հույսերը, որպեսզի ամեն ժամ ապրենք ու գործենք դրանք մարմնավորելու աներկբա կամքով` միասնական ջանքերով հաղթանակի առաջնորդելով նաև Լեռնային Ղարաբաղի Հանրապետության միջազգային ճանաչումը: Անվարան ու հաստատուն ընթանանք Տիրոջ ճանապարհներով, և ՙՆա այնպէս կանի,- ինչպես օրհներգում է սաղմոսերգուն,- որ արդարութիւնդ երեւայ, ինչպէս լոյս, եւ իրաւունքդ` ինչպէս ցերեկ՚ (Սղմ. ԼԶ 6): Սիրելիներ, Արցախի նվիրական հողից Հայրապետական Մեր աղոթքը առ Աստված բարձրացնելով, հայցում ենք, որ Իր Սուրբ Աջի հովանու ներքո խաղաղ պահպանի մեր Հայրենիքը, մեր ժողովրդին ի սփյուռս աշխարհի և հանապազ օրհնի ազգիս` մարմնավորելու մեր իղձերն ու մեր լուսավոր գալիքը: Մեր աղոթքն ենք բարձրացնում երկինք հոգիների համար Արցախյան ազատամարտում և Երկրորդ աշխարհամարտում զոհված մեր զավակների և բոլոր նրանց համար, ովքեր իրենց կյանքով կերտեցին հաղթանակը: Փառք, բյուր հազար փառք, աշխարհասփյուռ ազգիս հայոց: Փառք Արցախի հերոսական ժողովրդին, Պաշտպանության բանակին: Փառք ու կրկին փառք Հայրենիքը պաշտպանողներին, զորացնողներին և շենացնողներին: Թող միշտ ապրեն նրանց բարի գործերը և ներշնչեն նոր արարումների, թող սերնդեսերունդ հիշվեն նրանց պանծալի անունները:
