Inicio » 2012 » Octubre » 16 » 20-րդ միջազգային էկումենիկ կոնֆերանսը Իտալիայի Բոզե վանական համալիրում
0:49 AM
20-րդ միջազգային էկումենիկ կոնֆերանսը Իտալիայի Բոզե վանական համալիրում
Սեպտեմբերի 5-8-ը` Իտալիայի Բոզե վանական համալիրում ՙՄարդն իբրև արարչագործության պահապան՚ խորագրի ներքո տեղի ունեցավ 20-րդ միջազգային էկումենիկ կոնֆերանսը, որին մասնակցում էին բազում ներկայացուցիչներ Ուղղափառ, Արևելյան Ուղղափառ և Կաթոլիկ Եկեղեցիներից, ինչպես նաև գիտնականներ տարբեր կրթական հաստատություններից: Ն.Ս.Օ.Տ.Տ Գարեգին Բ Ծայրագույն Պատրիարք և Ամենայն Հայոց Կաթողիկոսի օրհնությամբ կոնֆերանսին մասնակցեց Միլանի հոգևոր հովիվ Տ. Թովմա աբեղա Խաչատրյանը, որն ընթերցեց Հայոց Հայրապետի օրհնության խոսքը: ՙԱստծո անսահման սիրո դրսևորումն էր արարչագործությունը: Իբրև Աստծո պատկերով և նմանությամբ ստեղծված բանական էակի` Աստված մարդուն զարդարեց Սուրբ Հոգու զանազան շնորհներով և մեծ պատասխանատվություն դրեց նրա վրա` պահապանը դառնալու ողջ արարչագործության, մշտական խնամք և հոգածություն ցուցաբերելու արարչաստեղծ բնության հանդեպ, խելամտորեն և զգուշորեն օգտվելու նաև բնության բարիքներից:… Արդի մարտահրավերներից է բնության պահպանումը աշխարհի և գալիք սերունդների մասին մտահոգությամբ: Ուստի մեծապես կարևոր է մարդու մեջ արթուն պահել բնության հանդեպ Արարչից նրան տրված պատասխանատվությունը` խուսափելու համար երկիր մոլորակին սպառնացող բնապահպանական աղետներից, համատեղ ջանքերով կառուցելու բարօր ու առաջագնա կյանքը համայն մարդկության՚,- նշվում է Վեհափառ Հայրապետի խոսքում: Կոնֆերանսի ընթացքում բանախոսները և ներկաները Սուրբ Գրքի և հայրաբանական ժառանգության տեսանկյուններից անդրադարձան արարչագործության պատմությանը և արդի բնապահպանական խնդիրներին` կարևորելով Եկեղեցիների դերը դրանց հաղթահարման գործում: ՄայրԱթոռՍ. Էջմիածին
