Inicio » 2012 » Noviembre » 27 » Ամենայն Հայոց Կաթողիկոսն ընդունեց Գերմանիայի Բունդեսթագի փոխնախագահին
1:19 PM
Ամենայն Հայոց Կաթողիկոսն ընդունեց Գերմանիայի Բունդեսթագի փոխնախագահին
Հոկտեմբերի 2-ին Մայր Աթոռ Ս. Էջմիածնում Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսն ընդունեց Գերմանիայի Դաշնային Հանրապետության Բունդեսթագի փոխնախագահ Վոլֆգանգ Թիրզեի գլխավորած պատվիրակությանը: Հանդիպման ընթացքում Ամենայն Հայոց Կաթողիկոսն ուրախություն հայտնեց, որ երկու երկրների միջև հարաբերությունները առաջընթաց և զարգացում են ապրում` բարի արգասիքներ բերելով երկու ժողովուրդներին: Նորին Սրբությունը նշեց, որ միջխորհրդարանական հարաբերությունների սերտացումը կնպաստի տարածաշրջանային խնդիրների առավել խորը ընկալմանը` գոհունակություն հայտնելով տարածաշրջանում խաղաղության կայունացմանն ու առկա խնդիրների խաղաղ կարգավորմանն ուղղվող ջանքերի համար: Վեհափառ Հայրապետը նաև իր գնահատանքը բերեց փոխնախագահ Վոլֆգանգ Թիրզեին` Բունդեսթագի կողմից Հայոց ցեղասպանության ճանաչման և դատապարտման գործում իր ունեցած կարևոր ներդրման համար: Զրույցի ընթացքում անդրադարձ կատարվեց Հայաստանյայց Առաքելական Սուրբ Եկեղեցու և Քույր Եկեղեցիների կապերին ու համագործակցությանը, եկեղեցի-պետություն հարաբերություններին, ինչպես նաև տարածաշրջանում առկա խնդիրների կարգավորման գործում հոգևոր առաջնորդների դերակատարությանը: Ամենայն Հայոց Կաթողիկոսը և Բունդեսթագի փոխնախագահը խոսեցին նաև ազգային ինքնության պահպանության գործում Եկեղեցու առաքելության մասին: Հանդիպմանը ներկա էր Գերմանիայի հայոց թեմի փոխառաջնորդ Տ. Սերովբե վարդապետ Իսախանյանը:
