Հոկտեմբերի 11-ին Մայր Աթոռ Սուրբ Էջմիածնում Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսն ընդունեց Սլովակիայի Գերագույն դատարանի նախագահ Շտեֆան Հարաբինի գլխավորած պատվիրակությանը` ուղեկցությամբ ՀՀ Վճռաբեկ դատարանի նախագահ Արման Մկրտումյանի, ՀՀ Արմավիրի մարզպետ Աշոտ Ղահրամանյանի և Սլովակիայի հայ համայնքի նախագահ Աշոտ Գրիգորյանի: Ողջունելով հյուրերին` Նորին Սրբությունը գոհունակություն հայտնեց երկու երկրների դատական կառույցների միջև ձևավորած սերտ համագործակցության համար: Զրույցի ընթացքում Վեհափառ Հայրապետը իր գնահատանքն ու օրհնությունը փոխանցեց Սլովակիայի իշխանություններին` Սլովակիայում ապրող հայորդիների նկատմամբ դրսևորած բարիացակամ վերաբերմունքի համար: Վեհափառ Հայրապետը նաև ողջունեց Սլովակիայի իշխանությունների ցուցաբերած զորակցությունը հայ ժողովրդին և նրա վճռական կեցվածքը Հայոց ցեղասպանության ընդունման և դատապարտման հարցում: Հանդիպման ընթացքում անդրադարձ կատարվեց նաև Հունգարիայի իշխանությունների կողմից սպա Ռամիլ Սաֆարովի` Ադրբեջանին արտահանձնման խնդրին: Այս առնչությամբ Վեհափառ Հայրապետը նշեց, որ նման երևույթները` իբրև ազգատյացության քարոզչություն, համընդհանուր դատապարտության պետք է արժանանան, հակառակ դեպքում` ցավալի անդրադարձ կարող են ունենալ մարդկային կյանքում:
*** Նույն օրը Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսն ընդունեց Քյոլնի (Գերմանիա) Կաթոլիկ և Ավետարանական եկեղեցիների ուխտավորներին` գլխավորությամբ Փորցի Բողոքական եկեղեցու հոգևոր հովիվ Կառլ Գյոփելի: Հանդիպման ընթացքում Նորին Սրբությունն անդրադարձավ Հայ Եկեղեցու հարաբերություններին Քույր Եկեղեցիների և այլ քրիստոնեական հարանվանությունների հետ: Վեհափառ Հայրապետն ուրախություն հայտնեց, որ հյուրերն ուխտագնացության վայր են ընտրել Հայաստանը` վստահություն հայտնելով, որ այն հնարավորություն պիտի ընձեռի լավագույնս ճանաչելու Հայ Առաքելական Եկեղեցին և հայ ժողովրդի հոգևոր-մշակութային ժառանգությունը:
Մայր Աթոռ Ս. Էջմիածին Տեղեկատվական համակարգ տնօրեն` Տ. Վահրամ քահանա Մելիքյան